Қашқадарёда 9 ёшли болани дарёдан қутқарган ФВВ ходими тақдирланди
Маёр Ҳусниддин Шараповга "Аъло хизматлари учун" кўкрак нишони ва пул мукофоти топширилди.
Фавқулодда вазиятлар вазири Азизбек Икрамов Қашқадарё вилояти Фавқулодда вазиятлар бошқармаси ходими, маёр Ҳусниддин Шараповни жасорат ва фидокорона хизматлари учун “Аъло хизматлари учун” кўкрак нишони ҳамда пул мукофоти билан тақдирлади. Бу ҳақда вазирлик матбуот хизмати хабар берди.
Мазкур мукофот жорий йилнинг 23-май куни Қашқадарё вилояти Китоб тумани “Боғбон” маҳалласи ҳудудидан оқиб ўтувчи Қашқадарё дарёсида содир бўлган фавқулодда ҳолат чоғида кўрсатилган қаҳрамонлик муносабати билан топширилган.
9 ёшли бола велосипед миниб кетаётиб, мувозанатни йўқотган ҳолда дарёга тушиб кетган. Вазиятни тезкор баҳолаган маёр зудлик билан сувга сакраб, болани қутқариб қолган эди.
Унинг жасорати ва хизматдаги фидойилиги юқори баҳоланиб, Фавқулодда вазиятлар вазири томонидан давлат мукофоти ҳамда рағбатлантирувчи пул мукофоти топширилган.
