Қашқадарёда ФВВ офицери чўкаётган болани қутқариб қолди
Бола велосипедда кетаётиб, мувозанатни йўқотган ва дарёга тушиб кетган.
Қашқадарё вилояти Китоб туманида ФВВ ходими дарёга чўкаётган 9 ёшли болани қутқариб қолди. Бу ҳақда ФВВ хабар берди.
Маълум қилинишича, ҳодиса 23 май куни соат 17:00 атрофида туманнинг “Боғбон” маҳалласида содир бўлган. 9 ёшли бола велосипедда кетаётиб мувозанатини йўқотган ва Қашқадарё дарёсига тушиб кетган.
Воқеани кўрган боланинг акаси атрофдагиларни ёрдамга чақира бошлаган. Шу пайт дарё яқинида яшовчи Фавқулодда вазиятлар вазирлиги ходими, майор Ҳусниддин Шарапов болаларнинг овозини эшитиб қолган ва зудлик билан сувга сакраб, болани қутқариб олган.
Хабарга кўра, ҳозирда бола уйида бўлиб, аҳволи яхши.
