“Болалар — жамиятимизнинг энг қимматли бойлиги” — Зироат Мирзиёева
Ўзбекистон Биринчи хоними Халқаро болаларни ҳимоя қилиш куни муносабати билан болаларни табриклаб, уларнинг бахтли ва хавфсиз ҳаёт кечириши энг устувор вазифа эканини таъкидлади.
Ўзбекистон Биринчи хоними, “Замин” халқаро жамоат фонди Васийлик кенгаши раиси Зироат Мирзиёева 1 июн — Халқаро болаларни ҳимоя қилиш куни муносабати билан болаларга байрам табригини йўллади.
Зироат Мирзиёева ўзининг Телеграм саҳифасида эълон қилган мурожаатида болаларни жамиятнинг энг қимматли бойлиги сифатида эътироф этиб, уларнинг бахтли ва фаровон келажагини таъминлаш ҳар бир давлат ва жамиятнинг устувор вазифаси эканини таъкидлаган.
Биринчи хонимнинг қайд этишича, ҳар бир бола тинчлик, меҳр-муҳаббат ва ғамхўрлик муҳитида улғайиши, сифатли таълим олиш имкониятига эга бўлиши ҳамда давлат ва жамият томонидан кўрсатилаётган эътибор ва қўллаб-қувватлашни ҳис этиши лозим.
Шунингдек, у болаларнинг ҳуқуқ ва манфаатларини ҳимоя қилиш, улар учун тенг имкониятлар яратиш ҳамда ривожланиш йўлидаги барча тўсиқларни бартараф этиш муҳим аҳамият касб этишини қайд этган.
