Халқаро ташкилотлардаги ўзбекистонликлар мамлакат нуфузини юксалтирмоқда — Саида Мирзиёева
Президент администрацияси раҳбари Венада халқаро ташкилотларда ишлаётган ватандошлар билан учрашди.
Вена шаҳрига ташрифи доирасида Саида Мирзиёева халқаро ташкилотларда фаолият юритаётган ватандошлар билан учрашди.
Мулоқот чоғида хорижда меҳнат қилаётган ўзбекистонлик мутахассисларнинг халқаро майдондаги фаолияти, уларнинг профессионал ютуқлари ҳамда мамлакат нуфузини мустаҳкамлашга қўшаётган ҳиссаси алоҳида эътироф этилди.
Таъкидланганидек, ватандошлар ўз билим ва тажрибаси, юксак масъулияти ҳамда фидокорона меҳнати билан Ўзбекистонга бўлган ишончни мустаҳкамлаб, халқаро ҳамжамиятда мамлакатимизнинг муносиб вакили сифатида фаолият юритмоқда.
Учрашувда, шунингдек, хорижда яшаб ва ишлаётган бўлишига қарамай, юртдошларнинг Ватан билан мустаҳкам алоқаларни сақлаб қолаётгани, мамлакат тараққиёти ва халқаро ҳамкорликни ривожлантириш жараёнларида фаол иштирок этаётгани юқори баҳоланди.
Мулоқот давомида халқаро ташкилотларда фаолият юритаётган ўзбекистонлик мутахассислар сафини кенгайтириш, ёшларни глобал тажриба орттиришга рағбатлантириш ва уларнинг профессионал ривожланишини қўллаб-қувватлаш масалаларига алоҳида эътибор қаратилди.
Қайд этилганидек, халқаро майдонда муваффақият қозонаётган, билим ва салоҳиятини Ватан равнақи ҳамда глобал тараққиёт йўлида сафарбар этаётган ёшларни қўллаб-қувватлаш бундан буён ҳам устувор йўналишлардан бири бўлиб қолади.
