“Маданият ривожи учун нафақат илҳом, балки шарт-шароит ҳам керак” — Саида Мирзиёева
Ўзбекистонда санъат ва адабиёт соҳаларини янада ривожлантириш бўйича янги фармон имзоланди.
Президент томонидан маданият ва креатив индустрияни ривожлантиришга қаратилган янги фармон имзоланди. Бу ҳақда Президент администрацияси раҳбари Саида Мирзиёева ёзди.
Фармонга мувофиқ, истиқболли ижодий лойиҳаларни қўллаб-қувватлаш мақсадида “Ижодга инвестиция” давлат мақсадли жамғармаси ташкил этилади. Мазкур жамғармага ҳар йили 200 миллиард сўм маблағ ажратилиши белгиланган.
Эндиликда концерт ташкилотчилиги билан шуғулланувчи тадбиркорлар, фильм ва сериал тасвирга олувчи кинокомпаниялар, болалар учун контент ишлаб чиқарувчилар, хусусий театр ва студиялар, маданият соҳасидаги хусусий таълим муассасалари қўшилган қиймат, фойда, айланма, ер, мулк солиқлари ҳамда ходимларнинг иш ҳақидан олинадиган жисмоний шахсларнинг даромад солиғидан озод этилади.
Хорижий кино компаниялари учун ҳам қулай шароитлар яратилади. Хусусан, уларнинг Ўзбекистон ҳудудида кино маҳсулотларини ишлаб чиқаришдан олган даромадлари норезидентларнинг даромади сифатида солиқ базасига киритилмайди.
Нуфузли халқаро ва республика танловлари ғолиблари пул мукофотлари билан тақдирланади:
- гран-при ва биринчи ўрин учун тегишли равишда 300 ва 100 миллион сўм,
- иккинчи ўрин учун 200 ва 50 миллион сўм,
- учинчи ўрин учун эса 100 ва 25 миллион сўм берилади.
Ғолибларни тайёрлаган ўқитувчи ва концертмейстерларга йил давомида ойлик маошининг 100 фоизигача миқдорда устама тўланади.
Бундан ташқари, ҳар йили маданият, санъат ва ижод соҳалари вакиллари орасидан уй-жойга муҳтож бўлган минг нафар ходимга ипотека кредити дастлабки тўловининг 50 фоизи қоплаб берилади.
