Президент кимё саноати корхоналари фаолиятини танқид қилди
Давлат раҳбари кимё саноати ўсиш суръатлари мамлакат саноатидаги умумий кўрсаткичлардан анча паст эканини қайд этди.
Шавкат Мирзиёев раислигида ўтказилган кимё саноатини ривожлантиришга бағишланган видеоселектор йиғилишида тармоқдаги мавжуд муаммолар ва фойдаланилмаётган имкониятлар танқидий таҳлил қилинди.
Йиғилишда қайд этилишича, сўнгги тўққиз йил давомида мамлакат саноати ўртача 6,3 фоизга ўсган бўлса, кимё саноатидаги ўсиш суръати 3 фоизга ҳам етмаган. Шу билан бирга, кимё маҳсулотлари импорти йилига 4,5 миллиард долларга етгани таъкидланди.
Давлат раҳбари маҳаллий корхоналар томонидан ишлаб чиқарилаётган кимё маҳсулотлари ички талабнинг ҳатто 60 фоизини ҳам қоплай олмаётганини қайд этди. Шунингдек, мавжуд ишлаб чиқариш салоҳиятидан етарли даражада фойдаланилмаётгани, тармоқда бир ишчига тўғри келадиган қўшилган қиймат бошқа давлатларга нисбатан 2–3 баробар пастлиги кўрсатиб ўтилди.
Йиғилиш давомида “Ўзкимёсаноат” акциядорлик жамияти фаолияти ҳам танқид қилинди. Хусусан, компания асосан ўз тизимидаги йирик корхоналар билан ишлаётгани, соҳада фаолият юритаётган 5 мингдан ортиқ корхона билан тизимли ҳамкорлик йўлга қўйилмагани, уларнинг муаммо ва таклифларини ўрганиш жараёни сустлиги қайд этилди.
Шу муносабат билан давлат раҳбари кимё саноати корхоналари вакиллари билан шахсан учрашиб, соҳадаги долзарб масалалар, тадбиркорларни қийнаётган муаммолар ҳамда истиқболдаги ривожланиш йўналишларини муҳокама қилишга қарор қилганини маълум қилди.
