Президент Шавкат Мирзиёев “Kmita Polymers” корхонасидаги ишлаб чиқариш жараёнлари билан танишди

 

Президент Шавкат Мирзиёев Тошкент вилоятидаги “Чирчиқ” кимё-индустриал технопаркида фаолият юритаётган “Kmita Polymers” корхонасига ташриф буюриб, ишлаб чиқариш жараёнлари ва корхонанинг истиқболдаги режалари билан танишди.

 

                                               

 

Россиянинг “Polymers” компанияси билан ҳамкорликда ташкил этилган корхона махсус ва кенг ассортиментдаги полиетилен ҳамда термоқисқарувчи плёнка маҳсулотлари ишлаб чиқаришга ихтисослашган. Мазкур маҳсулотлар озиқ-овқат, фармацевтика, қурилиш материаллари, маиший техника ва бошқа саноат тармоқларида қадоқлаш воситаси сифатида кенг қўлланилади.

 

Корхонада Италиянинг замонавий технологик ускуналари асосида ишлаб чиқариш йўлга қўйилган бўлиб, у 6 минг 670 квадрат метр майдонни эгаллайди. Лойиҳа доирасида импорт ўрнини босувчи маҳсулотлар ишлаб чиқариш йўлга қўйилиб, йилига 9,5 миллион долларлик маҳсулотларни маҳаллийлаштириш имконияти яратилган.

 

                                       

 

Умумий қиймати 15,2 миллион долларга тенг бўлган лойиҳа икки босқичда амалга оширилмоқда. Биринчи босқичда 7,4 миллион доллар инвестиция ўзлаштирилиб, 50 та янги иш ўрни яратилди. Келгусида корхона қувватлари кенгайтирилиши ва қўшимча иш ўринлари ташкил этилиши режалаштирилган.

 

                                             

 

Маълум қилинишича, 2025-йилда корхонада 115 миллиард сўмлик маҳсулот ишлаб чиқарилган. Шунингдек, 6 миллион долларлик маҳсулот Марказий Осиё мамлакатларига экспорт қилинган.

 

Бугунги кунда корхона маҳсулотлари Coca-Cola, Pepsi, Flash, «Черноголовка», Ackerman, Asl Oyna, Biolife ва Family Group каби йирик брендларнинг қадоқлаш тизимларида маҳаллий хомашё сифатида қўлланилмоқда.

 

                                       

 

Ташриф давомида қадоқлаш саноати замонавий иқтисодиётнинг муҳим ва тез ривожланаётган йўналишларидан бири экани таъкидланди. Бундай корхоналар нафақат саноат ишлаб чиқаришини ривожлантириш, балки озиқ-овқат, фармацевтика, қурилиш ва қишлоқ хўжалиги тармоқларининг барқарор фаолиятини таъминлашда ҳам муҳим ўрин тутиши қайд этилди.