Самарқандда МИБ орқали 4 ойда 2,5 мингта оила яраштирилди
Шунингдек, 17 196 нафар алимент тўловчининг бандлиги таъминланди.
Мажбурий ижро бюроси органлари фаолияти фақат қарздорликни ундириш билан чекланмайди. Бюро тизимида, аввало, инсонийлик тамойилларига таянилган ҳолда оилаларни сақлаб қолиш, фарзандлар манфаатини ҳимоя қилиш ва ажримларнинг олдини олишга алоҳида эътибор қаратилади.
Шу мақсадда Мажбурий ижро бюроси Самарқанд вилоят бошқармаси органлари томонидан 2026 йилнинг ўтган 4 ойи давомида оилаларни яраштиришга қаратилган профилактик суҳбатлар ва тушунтириш ишлари олиб борилди. Натижада 2 524 та оила яраштирилди.
Шунингдек, алимент тўловчиларнинг бандлигини таъминлаш мақсадида туман (шаҳар) Бандликка кўмаклашиш марказлари ҳамда бошқа мутасадди идоралар билан ҳамкорликда манзилли чора-тадбирлар амалга оширилди.
Олиб борилган ишлар самарасида жами 29 525 та ижро иши бўйича алимент тўловчиларнинг 17 196 нафари бандлиги таъминланди.
Бу каби чора-тадбирлар оилалар мустаҳкамлигини таъминлаш, алимент қарздорлигини камайтириш ҳамда фарзандлар таъминотини яхшилашга хизмат қилмоқда.
