Термизда банкоматлар ёниб кетди
Ёнғиннинг келиб чиқиш сабаблари ҳамда етказилган моддий зарар миқдори аниқланмоқда.
Сурхондарё вилоятининг Термиз шаҳрида учта банкоматда ёнғин содир бўлди. Бу ҳақда Сурхондарё ФВБ хабар берди.
Маълумотларга кўра, ҳодиса 2 июнь куни соат 04:14 да Термиз шаҳрининг “Дўстлик” маҳалласида жойлашган Бизнесни ривожлантириш банки Термиз банк хизматлари офисига қарашли учта банкоматда юз берган.
Хабар келиб тушгач, ёнғин жойига қутқарув бўлинмасининг бир экипажи жалб этилган. Ёнғин соат 04:20 да қуршаб олиниб, 04:28 да тўлиқ бартараф этилган.
Ҳодиса оқибатида жабрланганлар қайд этилмаган. Ҳозирда ёнғиннинг келиб чиқиш сабаблари ҳамда етказилган моддий зарар миқдори аниқланмоқда.
