АҚШда ноқонуний пойга уюштирган ўзбекистонликлар қўлга олинди
Ҳодиса бўйича Audi, BMW, Ford Mustang ҳамда Dodge Challenger русумли автомобиллар жарима майдонига олиб кетилган.
АҚШнинг Синсиннати шаҳридаги Paycor стадиони яқинида ноқонуний кўча пойгаси ташкил этилгани ҳақидаги хабардан сўнг полиция томонидан олти нафар шахс қўлга олинди. Fох19 маълумотларига кўра, улар орасида Ўзбекистон фуқаролари ҳам бор.
Қайд этилишича, стадион хавфсизлик хизмати ҳудудда шубҳали ҳаракатлар кузатилаётгани юзасидан ҳуқуқни муҳофаза қилувчи органларга мурожаат қилган. Текширув давомида бир неча шахслар стадион ҳудудига ноқонуний киргани ва айрим ҳолатларда ноқонуний кўча пойгасини ташкил этгани аниқланган.
Ҳодиса бўйича Ауди, Audi, BMW, Ford Mustang ҳамда Dodge Challenger русумли автомобиллар жарима майдонига жойлаштирилган.
Ҳозирда иш бўйича тергов ҳаракатлари олиб борилмоқда. Гумонланувчиларга нисбатан қонунчиликда белгиланган тартибда жазо чоралари қўлланилиши мумкин.
Ҳозирча қўлга олинган шахсларнинг айби суд томонидан тўлиқ исботлангани ҳақида расмий маълумот берилмаган.
