Ҳиндистонда меҳмонхона ёниб кетти, 21 киши ҳалок бўлди
Ёнғин бинонинг биринчи қаватида жойлашган ресторанда бошланган.
Ҳиндистоннинг Нъю-Деҳли шаҳрида меҳмонхонада юз берган ёнғин оқибатида камида 21 киши ҳалок бўлди. Бу ҳақда Пресс Труст оф Индиа нашри маълум қилди.
Воқеа 3 июн куни пойтахтнинг Малвия Нагар ҳудудида жойлашган беш қаватли меҳмонхонада содир бўлган. Дастлабки маълумотларга кўра, ёнғин бинонинг биринчи қаватида жойлашган ресторанда бошланган ва тез орада юқори қаватларга ҳам тарқалган.
Расмийларнинг билдиришича, ҳодиса вақтида ресторанда тахминан 40 киши бўлган. Тезкор қутқарув хизматлари ва ўт ўчириш гуруҳлари воқеа жойига етиб бориб, камида 40 нафар одамни қутқаришга муваффақ бўлган.
Воқеа жойидан олинган тасвирларда бинони кучли аланга қамраб олгани, қалин тутун кўтарилгани ва бинонинг ташқи қисмлари жиддий зарар кўргани акс этган. Айрим гувоҳларнинг айтишича, одамлар ёнғиндан қочишга уриниб, бинодан сакрашга мажбур бўлган.
Айни пайтда ёнғин сабаблари ва ҳолат тафсилотларини аниқлаш бўйича тергов ишлари олиб борилмоқда.
Ҳиндистон Бош вазири Нарендра Моди ҳалок бўлганларнинг яқинларига ҳамдардлик билдириб, жароҳатланганларга тезроқ соғайиш тилаган.
