Трансчегаравий катта наркогуруҳ ушланди
Гуруҳ Тожикистондан Қирғизистон орқали Ўзбекистонга гиёҳванд моддалар етказиб бериш билан шуғулланган.
Қирғизистон Ички ишлар вазирлигининг Гиёҳванд моддалар савдосига қарши курашиш хизмати Ўзбекистон ва Тожикистон ҳуқуқни муҳофаза қилувчи органлари билан ҳамкорликда трансмиллий наркотрафик фаолиятини фош этди. Бу ҳақда Kabar.kg нашри хабар берди.
Махсус операция давомида Афғонистондан Қирғизистон орқали келиб, Ўзбекистонга транзит йўли билан етказиб берилган катта миқдордаги гиёҳванд моддалар канали йўқ қилинган.
Тергов маълумотларига кўра, 1964 йилда туғилган, илгари бир неча маротаба жиноий жавобгарликка тортилган хориж фуқароси ушланган. Унинг ёнидан 51 килограмм миқдоридаги афғон гашиши топилган.
Аниқланишича, қўлга олинган шахс Тожикистондан Қирғизистон ҳудуди орқали гиёҳванд моддаларни контрабанда йўли билан олиб ўтиб, кейинчалик Ўзбекистон ҳудудига етказиб бериш билан шуғулланган жиноий гуруҳ ташкилотчиси бўлган.
Ҳозирда жиноий схеманинг бошқа иштирокчиларини аниқлаш, гиёҳванд моддалар етказиб бериш каналларини фош этиш бўйича тергов ва тезкор-қидирув ҳаракатлари давом этмоқда.
