Деҳлидаги ёнғин қурбонлари орасида ўзбекистонликлар йўқ — ТИВ
Меҳмонхонада содир бўлган мазкур ёнғин натижасида 21 киши ҳалок бўлган эди.
Ўзбекистоннинг Ҳиндистондаги элчихонаси Деҳли шаҳрининг жанубий қисмида жойлашган меҳмонхонада юз берган ёнғин оқибатида ҳалок бўлган ва жароҳатланганлар орасида Ўзбекистон фуқаролари йўқлигини маълум қилди. Бу ҳақда “Дунё” ахборот агентлиги хабар берди.
3 июнь куни содир бўлган мазкур ёнғин натижасида 21 киши ҳалок бўлган. Маҳаллий расмий манбаларга кўра, қурбонларнинг катта қисми Либерия, Нигерия, Мозамбик ва Бангладеш каби давлатлар фуқаролари ҳисобланади.
Дастлабки маълумотларга кўра, ёнғин меҳмонхонанинг биринчи қаватида жойлашган ресторан ҳудудидан бошланган бўлиши мумкин. Бинода ёнғин хавфсизлиги талабларининг бузилиши, жумладан, чекланган чиқиш йўлаклари ва ортиқча хона сиғими вазиятни янада оғирлаштирган.
Воқае жойидан 40 дан ортиқ киши эвакуация қилинган бўлиб, уларнинг бир қисми турли даражада жароҳат олган.
Ўзбекистон элчихонасининг консуллик бўлими Ҳиндистоннинг ваколатли органлари билан ҳамкорликда вазиятни ўрганиб чиққан ва ўзбекистонликлар орасида жабрланганлар йўқлигини тасдиқлаган.
