Кореяга иш ва ўқишга юбориш билан боғлиқ фирибгарлик ҳолатлари аниқланди

Ўзбекистонда фуқароларни Корея Республикасига ишга ёки ўқишга юборишни ваъда қилиб, пул олган бир неча шахслар фирибгарликда гумонланиб қўлга олинди. Бу ҳақда Бош прокуратура ҳузуридаги Департамент маълум қилди.

 

Қайд этилишича, Бухоро вилоятида ўтказилган тезкор тадбир давомида фуқаро Н.Ж. Миграция агентлигида ишловчи танишлари орқали бир фуқарони Кореяга юборишини айтиб, 7 минг АҚШ долларини олган вақтида ашёвий далиллар билан ушланган.

 

Андижон вилоятида эса “Н.К.” нодавлат таълим муассасаси раҳбари С.Э. юқори лавозимларда ишловчи танишлари орқали фуқаро О.А.га 6 минг АҚШ доллари ва 3 миллион сўм эвазига хорижий давлатларнинг бакалавр дипломи ҳамда Кореяга кетиш учун ишчи виза олиб беришини ваъда қилган. У ушбу маблағлардан 500 АҚШ доллари ва 3 миллион сўмни олган вақтида қўлга олинган.

 

Дастлабки текширувларда С.Э. яна 14 нафар фуқародан Кореяга ишчи виза олиб бериш ваъдаси билан жами 44,1 минг АҚШ долларини фирибгарлик йўли билан қўлга киритгани аниқланган.

 

Наманган вилоятида ўтказилган тезкор тадбирда “Г.В.” МЧЖ раҳбари А.В. икки нафар фуқарони Кореядаги олий таълим муассасасининг магистратура босқичига ўқишга ва ишга жойлаштиришни ваъда қилиб, 11 минг АҚШ долларини олган вақтида ушланган.

 

Сурхондарё вилоятида эса фуқаро Ф.Р. фуқаро А.Қ.ни 10 минг АҚШ доллари эвазига Кореяга ишга юборишини айтиб, ушбу маблағ ҳисобидан 5 минг АҚШ доллари ва 61 миллион сўмни олган вақтида ашёвий далиллар билан қўлга олинган.

 

Мазкур ҳолатлар юзасидан Жиноят кодексининг фирибгарлик ҳамда пора беришга оид моддалари билан жиноят ишлари қўзғатилиб, тергов ҳаракатлари олиб борилмоқда.