Шавкат Мирзиёев Амин Тожиев вафоти муносабати билан ҳамдардлик билдирди

Президент Шавкат Мирзиёев таниқли давлат ва жамоат арбоби, меҳнат фахрийси Амин Ҳамроевич Тожиевнинг вафоти муносабати билан унинг оила аъзолари ва яқинларига чуқур ҳамдардлик билдирди.

 

Амин Тожиев 4 июнь куни 79 ёшида вафот этган. У ўзининг кўп йиллик меҳнат фаолиятини мамлакат қишлоқ хўжалиги ҳамда Оролбўйи ҳудудини ривожлантиришга бағишлаган.

 

Фаолияти давомида Қорақалпоғистон Республикаси Вазирлар Кенгаши раиси, қишлоқ хўжалиги вазири, Ўрмон хўжалиги бошқармаси бошлиғи ҳамда Ўзбекистон давлат агросаноат қўмитаси раисининг биринчи ўринбосари каби масъул лавозимларда самарали меҳнат қилган.

 

Марҳум 50 йилдан ортиқ фаолияти давомида Оролбўйи минтақасининг ижтимоий-иқтисодий ривожланиши, инфратузилмани такомиллаштириш ва аҳоли фаровонлигини оширишга муносиб ҳисса қўшган.

Жумладан, Туямўйин–Нукус–Тахтакўпир суғориш тармоғи ҳамда қатор муҳим ижтимоий объектларни барпо этишда фаол иштирок этган.

 

Нафақага чиққанидан кейин ҳам у Қорақалпоғистоннинг ижтимоий ҳаётида фаол қатнашиб, экологик муҳитни яхшилаш, ободонлаштириш, кўкаламзорлаштириш ва ёшларни ватанпарварлик руҳида тарбиялаш йўналишларида самарали фаолият олиб борган.

 

Амин Тожиевнинг мамлакат тараққиётига қўшган хизматлари юксак баҳоланиб, у “Эл-юрт ҳурмати”, “Дўстлик”, “Меҳнат шуҳрати” орденлари ҳамда Қорақалпоғистон Республикасида хизмат кўрсатган механизатор фахрий унвони билан тақдирланган.