Тошкент метросида "свет" ўчиб қолди: ҳаракат тўхтаб қолган
Электр таъминотидаги узилишларга Тошкент ИЭСдаги трансформатор носозлиги сабаб бўлган.
Тошкент метрополитени маълумотига кўра, 4 июнь куни соат 12:41 атрофида Ўзбекистон, Чилонзор ва Юнусобод йўналишларида шаҳар электр тармоқларидаги авария сабаб қисқа муддатли электр узилиши юз берди. Бу ҳолат поездлар ҳаракати ҳамда бекатлардаги ёритиш тизимларига таъсир кўрсатди.
Метрополитен томонидан билдирилишича, вазият тезкорлик билан назоратга олинган. Ҳаракат хавфсизлигини таъминлаш учун захира генераторлари ишга туширилган бўлиб, бу тизим тўлиқ тиклангунга қадар иш жараёнини барқарор ушлаб туришга имкон берган.
Ҳозирда поездлар ҳаракати масъул хизматлар назорати остида давом этмоқда. Йўловчиларга етказилган ноқулайликлар учун узр сўралган.
Энергетика вазирлиги аввалроқ маълум қилишича, узилишларга Тошкент ИЭСдаги трансформатор носозлиги сабаб бўлган. Авария соат 13:01 да бартараф этилган, 13:22 га келиб эса барча истеъмолчиларда электр таъминоти тўлиқ тикланган.
