Туркияда 29 ёшли ўзбекистонлик аёл ўз жонига қасд қилди
Ўзбекистон Бош консулхонаси Туркиядаги фожиали ҳолат юзасидан маълумот берди.
Ўзбекистоннинг Истанбул шаҳридаги Бош консулхонаси маълумотига кўра, Туркияда 29 ёшли ўзбекистонлик аёл ўз жонига қасд қилган.
Қайд этилишича, жорий йилнинг 29 май куни ушбу ҳолат юзасидан консулхонага тегишли маълумот келиб тушган. Ҳозирда Туркиянинг ваколатли ҳуқуқ-тартибот органлари билан ҳамкорликда ҳолатнинг барча ҳолатлари ва тафсилотларини аниқлаш бўйича барча зарур ишлар олиб борилмоқда. Марҳуманинг яқин қариндошларига жасадни ватангa қайтариш ҳамда бошқа консуллик-ҳуқуқий ёрдам кўрсатиш чоралари кўрилмоқда.
Эслатиб ўтамиз, май ойи бошида Туркиянинг Сакария вилоятидаги алюминий заводида юз берган бахтсиз ҳодиса оқибатида 54 ёшли Ўзбекистон фуқароси вафот этган эди. Мазкур ҳолат юзасидан ҳам Бош консулхона томонидан маҳаллий ҳуқуқ-тартибот органлари ва тиббиёт муассасалари билан ҳамкорликда зарур ишлар амалга оширилиб, марҳумнинг жасади Ўзбекистонга юборилган.
