Ўзбек–Турк медиафорум доирасида КГК вакиллари билан учрашув ўтказилди
Глобал Журналистлар Кенгаши 80 дан ортиқ мамлакатда фаолият юритади.
Ўзбекистон Журналистлар уюшмасида Ўзбек–Турк медиафорум доирасида Ўзбекистонга ташриф буюрган Глобал Журналистлар Кенгаши (КГК) делегацияси билан учрашув бўлиб ўтди.
Тадбир давомида меҳмонларга Ўзбекистонда медиа соҳасини ривожлантириш бўйича амалга оширилаётган кенг кўламли ислоҳотлар ҳамда бу жараёнларда Ўзбекистон Журналистлар уюшмасининг ўрни ва фаолияти ҳақида батафсил маълумот берилди.
Мулоқот чоғида КГК президенти Меҳмет Али Дим, КГК фахрий асосчиси ва фахрий журналист Явуз Донат, шунингдек КГК Хорижий Медиа Кенгаши президенти ва Озарбайжон Журналистлар уюшмаси вице-президенти Элшад Эйвазли Ўзбекистонда журналистлар учун яратилаётган шароитларни юқори баҳоладилар.
Шунингдек, улар Ўзбекистон Журналистлар уюшмаси билан ҳамкорлик алоқаларини йўлга қўйиш ва келгусида қўшма лойиҳаларни амалга оширишга қизиқиш билдирдилар.
Маълумот учун, Глобал Журналистлар Кенгаши дунёнинг 80 дан ортиқ мамлакатида ўз вакилларига эга бўлган халқаро медиа тузилма ҳисобланади.
