Наманганда Чадаксойда оқим олиб кетган йигитнинг жасади топилди
Поп туманидаги бир неча кунлик қидирув якунланди.
Наманган вилоятининг Поп туманида Чадаксой сойида оқим олиб кетган йигитнинг жасади қидирув-қутқарув ишлари якунида топилди.
Фавқулодда вазиятлар вазирлиги маълумотига кўра, воқеа 28 май куни Шайхон маҳалласи ҳудудидан оқиб ўтувчи сойда содир бўлган. 2002-йилда туғилган йигит сузиш учун мўлжалланмаган жойда сувга тушиб кетган ва кучли оқим уни олиб кетган.
Қидирув ишлари бир неча кун давомида туман Фавқулодда вазиятлар бўлими ҳамда вилоят ФВВ қутқарувчилари томонидан олиб борилган.
Натижада марҳумнинг жасади топилиб, тегишли хизматларга топширилган.
ФВВ фуқароларга яна бир бор сув ҳавзаларида хавфсизлик қоидаларига қатъий риоя қилиш, тақиқланган ва хавфли жойларда чўмилмаслик бўйича огоҳлантириш берди.
Аввалроқ, Самарқандда эр-хотин 6 нафар қўшни болани электромопедда айлантиришга олиб чиқиб, каналга тушиб кетиши оқибатида 4 бола ҳалок бўлгаи хабар қилинган эди.
