Қурилишга рухсат олиш харажатлари 2 баробаргача қисқартирилади
Қурилиш обектларини улашда “1 та ариза – 1 та тўлов” тамойили жорий қилинади.
Президентнинг “Қурилиш соҳасида натижага асосланган бошқарувни жорий этиш ҳамда соҳада давлат хизматларини соддалаштириш чора-тадбирлари тўғрисида”ги фармони қабул қилинди. Бу ҳақда Адлия ваирлиги хабар берди.
Ҳужжатга мувофиқ, 2026 йил 1 сентябрдан бошлаб республиканинг барча ҳудудларида қурилиш соҳасидаги қатор давлат хизматлари бирлаштирилиб, ягона давлат хизмати — архитектура ва шаҳарсозлик талабларини бериш тизими жорий этилади.
Шунингдек, 2026 йил 1 июлдан қурилиш обектларини муҳандислик-коммуникация тармоқларига улаш “1 та ариза – 1 та тўлов – барча уланиш нуқталари” тамойили асосида амалга оширилади. Мазкур тартиб тадбиркорлар учун вақт ва маблағ сарфини сезиларли даражада камайтиришга хизмат қилади.
Фармонга кўра, бино конструкцияси, мустаҳкамлиги ва ёнғин хавфсизлигига таъсир қилмайдиган, шунингдек, қуввати ва мақсади ўзгармаган лойиҳалардаги айрим режалаштириш ўзгаришлари учун ҳужжатларни ҳудудий кенгашлар билан қайта келишиш амалиёти бекор қилинади.
Қурилиш соҳасидаги давлат хизматларини кўрсатиш жараёнида аниқланган камчиликларни бартараф этиш учун эса қўшимча 5 иш куни муддат берилади.
Бундан ташқари, 2026 йил 1 сентябрдан қурилиш обектлари устидан назоратни кучайтириш мақсадида видеокузатув камераларидан фойдаланиш амалиёти кенг жорий этилади. Хусусан, тадбиркорлар томонидан қуриладиган кўп қаватли уй-жойлар, меҳмонхона, туризм, савдо, саноат ҳамда III ва IV тоифадаги ижтимоий соҳа обектларида видеокузатув камераларини ўрнатиш мажбурий бўлади.
Шунингдек, буджет маблағлари ҳисобидан қуриладиган ва қиймати 3 миллиард сўмдан юқори бўлган обектларда ҳам видеокузатув тизимларини жорий этиш назарда тутилган.
