Журналистларнинг янги Ахлоқ-одоб кодекси лойиҳаси жамоатчилик муҳокамасига қўйилди

Ўзбекистон Журналистлар уюшмаси қошидаги Ишчи гуруҳ томонидан миллий журналистиканинг замонавий ривожланиш тенденсиялари, медиа маконидаги янги талаблар ҳамда илғор халқаро тажрибалар асосида ишлаб чиқилган янги таҳрирдаги “Ўзбекистон журналистларининг Ахлоқ-одоб кодекси” лойиҳаси кенг жамоатчилик муҳокамасига қўйилди. Хусусан, Кодекс лойиҳаси Уюшманинг веб-сайтига жойлаштирилган. 

 

Мазкур ҳужжат журналистлар, таҳририятлар, ахборот агентликлари, босма ва электрон оммавий ахборот воситалари, онлайн платформалар ҳамда жамоат манфаатларига дахлдор ахборотларни мунтазам тайёрлайдиган ва тарқатадиган медиа субектлари фаолиятида амал қилиниши лозим бўлган касбий-ахлоқий меъёрларни белгилашга қаратилган.

 

Кодекс лойиҳасининг асосий мақсади журналистика соҳасида касбий масъулиятни кучайтириш, ахборотнинг ҳаққонийлиги ва ишончлилигини таъминлаш, инсон ҳуқуқлари ҳамда қадр-қимматини ҳимоя қилиш, таҳририятлар мустақиллигини мустаҳкамлаш ва медиа фаолиятида очиқлик ҳамда шаффофлик тамойилларини янада ривожлантиришдан иборат.

 

Ҳужжатда ахборотни йиғиш, текшириш ва тарқатиш стандартлари, манбалар билан ишлаш қоидалари, факт ва фикрни ажратиш тамойиллари, манфаатлар тўқнашувининг олдини олиш, болалар ҳамда ҳимояга муҳтож шахслар ҳақидаги материалларни ёритишнинг этик мезонлари алоҳида белгиланган.

 

Шунингдек, кодекс лойиҳасида журналистларнинг ижтимоий тармоқлардаги фаолияти, рақамли медиа муҳитидаги касбий масъулияти, сунъий интеллект технологияларидан фойдаланишнинг этик тамойиллари, муаллифлик ҳуқуқи ва ахборот хавфсизлиги билан боғлиқ масалалар ҳам ўз аксини топган.

 

Медиа ҳамжамиятининг ўзини ўзи тартибга солиш механизмларини ривожлантириш мақсадида Ўзбекистон Журналистлар уюшмаси ҳузурида мустақил Этика комиссиясини ташкил этиш, мурожаат ва шикоятларни кўриб чиқиш тартиби ҳамда таҳририятлар фаолиятида масъулият ва очиқликни таъминлашга доир нормалар ҳам назарда тутилган.

 

Муҳими, ҳужжатда журналистика эркинлиги, таҳририят мустақиллиги ва сўз эркинлиги тамойилларини мустаҳкамлаш асосий устувор йўналиш сифатида қайд этилиб, ундан цензура ёки босим воситаси сифатида фойдаланилишига йўл қўйилмаслиги алоҳида таъкидланган.

 

Ўзбекистон Журналистлар уюшмаси журналистлар, блогерлар, медиа экспертлари, олий таълим муассасалари вакиллари, фуқаролик жамияти институтлари ҳамда кенг жамоатчиликни кодекс лойиҳаси муҳокамасида фаол иштирок этишга чорламоқда. Билдирилаётган таклиф ва тавсиялар ҳужжатни янада такомиллаштириш, замонавий журналистик этика стандартларини шакллантириш ҳамда мамлакатимиз медиа маконида масъулиятли ва профессионал журналистика тамойилларини мустаҳкамлашга хизмат қилади.