Нурота интернат уйида 19 нафар парваришланувчи ўз оиласига қайтарилди

 

Навоий вилоятидаги Нурота “Мурувват” ногиронлиги бўлган шахслар учун эркаклар интернат уйида айни пайтда 317 нафар фуқаро парваришланмоқда. Муассасада уларнинг муносиб ҳаёт кечириши, саломатлигини тиклаши ва жамиятга мослашуви учун зарур шарт-шароитлар яратилган. Бу ҳақда Ижтимоий ҳимоя агентлиги хабар берди.

 

Парваришланувчиларнинг бўш вақтини мазмунли ташкил этиш мақсадида 20 га яқин турли йўналишдаги тўгараклар фаолият юритмоқда. Шунингдек, “меҳнат терапияси” дастури доирасида ратан маҳсулотларидан стол-стуллар тайёрлаш, совундан безак гуллар ясаш, биогумус ишлаб чиқариш, иссиқхона ва дала майдонларида деҳқончилик билан шуғулланиш, чорва ҳамда паррандаларни парвариш қилиш ишлари йўлга қўйилган.

 

Муассасада ногиронлиги бўлган шахсларнинг ижтимоийлашуви ва оила билан алоқаларини мустаҳкамлаш масаласига ҳам алоҳида эътибор қаратилмоқда. Шу мақсадда ижтимоий ходимлар томонидан парваришланувчилар ва уларнинг яқинлари ўртасида мунтазам видеосуҳбатлар ташкил этилмоқда.

 

Амалга оширилган ишлар натижасида аввал яқинлари билан алоқаси узилган 98 нафар парваришланувчининг қариндошлари билан оилавий муносабатлари тикланган. Шундан 19 нафари жамиятга муваффақиятли мослаштирилиб, ўз оиласи бағрига қайтарилган.

 

Бундан ташқари, руҳий ҳолатида ижобий ўзгаришлар кузатилган ва меҳнат қобилияти юқори бўлган 30 нафар парваришланувчи мустақил ҳаётга тайёрлаш дастурига жалб этилган. Улар кураторлар назорати остида ўз-ўзига хизмат кўрсатиш, молиявий саводхонлик ҳамда ижтимоий ҳаёт кўникмаларини эгалламоқда.