“Прокурор” деб кўрсатилган шахс газ “заправка” директори экани аниқланди
Ижтимоий тармоқларда ҳайдовчи билан тортишиб, ўзини прокурор сифатида таништирган шахс иштирокидаги видео юзасидан Бош прокуратура расмий муносабат билдирди.
Ижтимоий тармоқларда тарқалган видеода ўзини прокурор сифатида таништирган шахс прокуратура органларида хизмат қилмаслиги маълум бўлди. Бу ҳақда Бош прокуратура расмий баёнот берди.
Қайд этилишича, ўтказилган текширув натижасида видеода акс этган эркак прокуратура тизими ходими эмаслиги аниқланган. Шу сабабли унинг прокуратура органларига алоқадорлиги ҳақидаги маълумотлар ҳақиқатга тўғри келмаслиги таъкидланди.
Бош прокуратура маълумотига кўра, мазкур шахс Тошкент вилояти Оҳангарон туманида жойлашган газ тўлдириш шохобчаларидан бирида директор лавозимида фаолият юритиши аниқланган.
Аввалроқ ижтимоий тармоқларда Дамас ҳайдовчиси ва икки эркак ўртасида юзага келган тортишув акс этган видео тарқалган эди. Унда автомобилни хусусий ҳудуддан олиб чиқиш масаласида баҳс юзага келгани қайд этилган.
Ҳозирча мазкур ҳолат юзасидан шахсга нисбатан кўрилган чоралар ҳақида расмий маълумот берилмаган.
