Сурхондарёдаги Александр Федин барпо этган боғ давлат муҳофазасига олинади
Ҳолат Экология ва иқлим ўзгариши миллий қўмитаси томонидан алоҳида назоратга олинган.
Ижтимоий тармоқларда Сурхондарё вилоятида Александр Федин томонидан барпо этилган боғ тақдири ҳамда унинг саломатлиги билан боғлиқ ҳолат юзасидан хабарлар тарқалди. Ҳолат юзасидан Экология ва иқлим ўзгариши миллий қўмитаси расмий муносабат билдирди.
Маълум қилинишича, ҳолат Ўзбекистон Президенти администрацияси ҳузуридаги Экология ва иқлим ўзгариши миллий қўмитаси томонидан алоҳида назоратга олинган.
Ҳозирда Александр Федин Термиз шаҳридаги тез тиббий ёрдам клиник шифохонасига жойлаштирилган бўлиб, унга зарур тиббий ёрдам кўрсатилмоқда.
Шунингдек, уни муносиб яшаш шароитлари билан таъминлаш ва Қўмита ҳузуридаги Ўрмон хўжалиги агентлиги тизимига ишга жойлаштириш бўйича чоралар кўрилаётгани билдирилди.
Расмий маълумотга кўра, Фединнинг мамлакат экологияси ва кўкаламзорлаштириш соҳасига қўшган ҳиссаси инобатга олиниб, у барпо этган боғни сақлаб қолиш ва ривожлантиришга қаратилган ҳужжат тайёрланмоқда.
Мазкур ҳудудни жамоатчилик учун очиқ экологик парк сифатида ташкил этиш ҳамда уни Экология ва иқлим ўзгариши миллий қўмитаси тасарруфига ўтказиш режалаштирилган. Келгусида парк негизида жамоат боғи ташкил этилиб, ҳудуднинг ноёб табиий меросини сақлаш ва бойитиш чоралари амалга оширилади.
Масъуллар Александр Фединнинг тақдирига бефарқ бўлмаган фуқароларга миннатдорлик билдирди.
