Ўзбекистон Президенти билан учрашув ва кечки овқат сабаб Зеленскийнинг хатини ўқишга улгурмадим — Путин
Россия президенти кеча Зеленскийнинг мурожаати билан танишганини маълум қилиб, бошқа давлатлар музокараларда фақат кафил сифатида иштирок этиши мумкинлигини қайд этди.
Владимир Путин Украина Президенти Владимир Зеленскийнинг очиқ хати билан танишганини маълум қилди.
Россия ОАВлари хабарига кўра, бу ҳақда давлат раҳбари Санкт-Петербург халқаро иқтисодий форуми ялпи мажлисида сўзлаган нутқи давомида маълум қилган.
Путиннинг айтишича, Кремл матбуот котиби Дмитрий Песков унга мазкур мактубни аввалроқ кўрсатган, бироқ ишчи учрашувлар ва тадбирлар сабаб уни батафсил кўриб чиқишга вақт топа олмаган.
“Кеча матбуот котиби менга бу хатни кўрсатди. Бироқ биз Ўзбекистон Президенти билан ишчи учрашув ва ишчи кечки овқат ўтказдик. Шу сабабли ҳужжатни кўриб чиқишга вақт бўлмади. Бугун эрталаб эса у яна мактубни тақдим этди ва мен у билан танишдим”, — деган Россия президенти.
Шунингдек, Путин Россия ва Украина ўртасидаги можарони ҳал этиш бўйича асосий қарорлар айнан икки давлат томонидан қабул қилиниши лозимлигини таъкидлаган. Унинг қайд этишича, бошқа мамлакатлар ва халқаро ҳамкорлар музокаралар учун зарур шароит яратиши ҳамда кафил сифатида иштирок этиши мумкин.
“Табиийки, асосий масалалар Россия ва Украина ўртасида ҳал қилиниши керак. АҚШ ва бошқа давлатлардаги ҳамкорларимиз эса зарур шароитларни яратиши ҳамда кафил сифатида ҳаракат қилиши мумкин”, — дея таъкидлаган Путин.
Эслатиб ўтамиз, 4 июн куни Владимир Зеленский Владимир Путинга йўллаган очиқ хатида шахсий учрашув ўтказиш ва томонлар ўртасида сулҳга эришиш масалаларини муҳокама қилишни таклиф қилган эди.
