Президент Иброҳим Ғафуров вафоти муносабати билан ҳамдардлик билдирди

Президент Шавкат Мирзиёев миллий адабиёт ва маданият ривожига улкан ҳисса қўшган атоқли адабиётшунос олим, адиб, таржимон ва жамоат арбоби, Ўзбекистон Қаҳрамони Иброҳим Ғафуров вафоти муносабати билан ҳамдардлик билдирди.

 

1937 йил 27 декабрда Тошкент шаҳрида туғилган Иброҳим Ғафуров Тошкент давлат университетини (ҳозирги Ўзбекистон Миллий университети) филолог мутахассислиги бўйича тамомлаган. Меҳнат фаолиятини Давлат бадиий адабиёт нашриётида муҳаррир сифатида бошлаган олим кейинчалик Ғафур Ғулом номидаги Адабиёт ва санъат нашриётида масъул лавозимларда фаолият юритган.

 

У узоқ йиллар давомида “Ўзбекистон адабиёти ва санъати” ҳамда “Миллий тикланиш” газеталарида раҳбарлик лавозимларида ишлади, шунингдек, Ўзбекистон Миллий университети ва Ўзбекистон давлат жаҳон тиллари университетида талабаларга сабоқ берди.

 

Иброҳим Ғафуров сиёсий ва жамоатчилик фаолиятида ҳам фаол иштирок этиб, Ўзбекистон Миллий тикланиш демократик партияси Марказий кенгаши раиси, Олий Мажлис депутати ва парламентнинг Матбуот ва ахборот қўмитаси раиси ўринбосари лавозимларида ишлаган.

 

Адабиётшунос олим ўзбек адабиётининг долзарб масалаларига бағишланган кўплаб илмий мақола, китоб ва рисолалар муаллифи сифатида танилган. У, шунингдек, Фёдор Достоевский, Эрнест Хемингуэй, Габриэл Гарсиа Маркес, Жеймс Жойс ва Чингиз Айтматов каби жаҳон адабиёти намояндаларининг асарларини ўзбек тилига таржима қилган.

 

Иброҳим Ғафуровнинг илм-фан, адабиёт ва маданият ривожига қўшган ҳиссаси давлат томонидан юксак баҳоланиб, унга “Ўзбекистон Қаҳрамони” унвони, “Ўзбекистон Республикаси санъат арбоби” фахрий унвони, шунингдек, “Дўстлик” ва “Меҳнат шуҳрати” орденлари берилган.

 

Ҳамдардликда Иброҳим Ғафуровнинг ёрқин хотираси халқ қалбида ҳамиша сақланиб қолиши таъкидланган.