Ўзбекистондаги барча олийгоҳларда “Тадбиркорлик асослари” фани ўқитилади

Президент Шавкат Мирзиёев олий таълим муассасалари битирувчиларининг бандлигини таъминлаш бўйича тақдимот билан танишди.

 

Маълум қилинишича, 2026 йилда республика олийгоҳларини 320 минг нафар талаба тамомлайди. Олий таълим билан қамров даражаси кенгайиб бораётгани сабабли меҳнат бозорига кириб келаётган битирувчилар сони ҳам ортмоқда.

 

Тақдимотда битирувчиларни иш билан таъминлаш учун уларни бўш иш ўринларига йўналтириш, тадбиркорлик ташаббусларини қўллаб-қувватлаш ҳамда олийгоҳлардаги карера марказлари фаолиятини кучайтириш масалаларига алоҳида эътибор қаратилди.

 

Қайд этилишича, битирувчиларнинг бизнес лойиҳаларини молиялаштиришга қаратилган “Келажакка қадам” дастури доирасида 2025 йилда 6 мингдан ортиқ лойиҳа учун 378 миллиард сўм маблағ ажратилган. Натижада қарийб 8 минг нафар битирувчининг бандлиги таъминланган.

 

2026 йилда эса 8 мингдан зиёд лойиҳани молиялаштириш учун 500 миллиард сўм йўналтириш ва 10 мингга яқин ёшни иш билан таъминлаш режалаштирилган. Дастур имкониятларини кенгайтириш мақсадида унда иштирок этаётган тадбиркорлик субъектларига қўшимча молиявий кўмак бериш таклиф этилди.

 

Шунингдек, “TalabaExpo-2026” касб кўргазмаларини иш берувчилар ва тадбиркорлик субъектлари иштирокида республиканинг барча ҳудудларида самарали ташкил этиш зарурлиги таъкидланди.

 

Битирувчилар бандлигини таъминлашда вазирлик ва идоралар, маҳаллий ҳокимликлар ҳамда йирик хўжалик бирлашмаларининг масъулиятини ошириш муҳимлиги қайд этилди. Бу борадаги ишлар “career.edu.uz" платформаси орқали мониторинг қилинади ва бандлик масаласи маҳаллий ҳокимликлар даражасигача туширилади.

 

Тақдимотда олийгоҳларда карера марказлари фаолиятини тўлиқ йўлга қўйиш ва уларнинг самарадорлигини “Битирувчи сифати индекси” асосида баҳолаш таклиф қилинди. Энг юқори натижа кўрсатган 20 та олийгоҳнинг карера марказларига 500 миллион сўмдан маблағ ажратилиши режалаштирилмоқда.

 

Жорий йилда олийгоҳлар миқёсида 360 та, факультетлар кесимида 750 та меҳнат ярмаркаси ҳамда мингдан ортиқ иш берувчилар билан учрашувлар ташкил этилиши кўзда тутилган.

 

Бундан ташқари, 2026/2027-ўқув йилидан бошлаб барча олийгоҳларда талабаларнинг бизнес юритиш кўникмаларини ривожлантириш мақсадида “Тадбиркорлик асослари” фанини ўқитиш йўлга қўйилади.

 

Шунингдек, талабалар стартапларини қўллаб-қувватлаш, спин-офф корхоналар фаолиятига ёшларни жалб этиш, кафедраларнинг ишлаб чиқариш корхоналарида филиалларини очиш ҳамда битирув ишлари ҳимоясини иш берувчи корхоналарда ўтказиш амалиётини кенгайтириш режалаштирилган.

 

Тақдимот давомида аниқ буюртмалар асосида кадрлар тайёрлашга қаратилган мақсадли дуал таълим тизимини жорий этиш ташаббуси ҳам илгари сурилди. Ушбу моделда иш берувчи ва олийгоҳ ўртасидаги келишув асосида талабаларни қабул қилиш ва контракт миқдорини белгилаш, ўқишни тамомлаган битирувчини иш билан таъминлаш кафолатланади.

 

Йиғилиш якунида Президент мутасаддиларга битирувчилар билан ишлаш тизимини такомиллаштириш, илгари сурилган ташаббусларни пухта ишлаб чиқиш ҳамда янги иш ўринларини яратиш бўйича барча имкониятларни сафарбар этиш юзасидан топшириқлар берди.