Фарғонада 376 млн сўмлик дори воситалари ёқиб йўқ қилинди
Маълум бўлишича, улар республика ҳудудига қонунга зид равишда олиб кирилган ва текширувдан ўтмаган.
Мажбурий ижро бюросининг Фарғона вилояти Тошлоқ туман бўлими томонидан суд ҳужжати ижросини таъминлаш доирасида навбатдаги ижро ҳаракатлари амалга оширилди.
Жиноят ишлари бўйича Тошлоқ туман судининг 2026 йил 16 апрелдаги қарорига асосан У.Д.дан ашёвий далил сифатида олинган ҳамда текширувдан қолган тиббий дори воситаларини йўқ қилиш ҳақидаги ижро ҳужжати бўлим иш юритувига келиб тушиб, белгиланган тартибда ижрога қабул қилинди.
Ижро ҳужжатига мувофиқ, 9 қутидаги 40 та ампула “Омнадрен-250” дори воситаси ҳамда жами 184 турдаги турли хил тиббий препаратларни йўқ қилиш бўйича мажбурий ижро ҳаракатлари тайинланди.
Белгиланган тартибда ҳамкор ташкилотлар ва масъул сақловчи иштирокида Тошлоқ туманида жойлашган марказий утилизация майдонида махсус ёқиш усули орқали умумий қиймати 376 миллион 500 минг 71 сўм бўлган дори воситалари тўлиқ йўқ қилинди.
Шу тариқа, суд ҳужжатининг ижроси амалда таъминланиб, ижро иши қонун талабларига мувофиқ тамомланди.
