Хитойда халқаро семинар: Тажриба алмашинуви ва янги ҳамкорликлар
Пекинда Ўзбекистон ва Хитой ҳамкорлигида тиббиёт ҳамда фармацевтика йўналишларига бағишланган 15 кунлик халқаро семинар ташкил этилди.
Ўзбекистоннинг Хитой Халқ Республикасидаги элчихонаси кўмагида ҳамда Тиббиёт ва фармацевтика тармоғини ривожлантириш агентлиги ташаббуси билан Пекин шаҳрида тиббиёт ва фармацевтика йўналишларига бағишланган 15 кунлик халқаро семинар ташкил этилди. Унда Миллий биофармацевтика илмий-тадқиқот институти вакиллари ҳам фаол иштирок этди.
Семинар давомида иштирокчилар Хитойнинг тиббиёт, фармацевтика ва анъанавий табобат соҳаларидаги илғор тажрибалари билан яқиндан танишиб, етакчи мутахассислар иштирокидаги илмий-амалий учрашувлар ва мулоқотларда қатнашдилар.
Хусусан, Миллий биофармацевтика илмий-тадқиқот институти вакиллари Пекиндаги қатор илмий марказлар, тиббиёт муассасалари ва фармацевтика ташкилотлари фаолияти билан танишиб, илмий ҳамкорлик истиқболлари юзасидан музокаралар олиб бордилар.
Тадбир доирасида Хитой халқ табобати йўналишидаги замонавий тиббиёт муассасалари фаолияти ўрганилди. Шунингдек, ўзаро ҳамкорликни кенгайтириш, тажриба алмашиш ҳамда истиқболдаги қўшма лойиҳаларни амалга ошириш масалалари муҳокама қилиниб, ҳамкорлик меморандумини имзолаш бўйича дастлабки келишувларга эришилди.
Мазкур семинар натижалари Миллий биофармацевтика илмий-тадқиқот институтининг халқаро алоқаларини кенгайтириш, илмий салоҳиятини янада мустаҳкамлаш ҳамда тиббиёт ва фармацевтика соҳаларида янги ҳамкорлик йўналишларини ривожлантиришга хизмат қилади.
