Путинни ҳибсга олиш ордерини берган прокурор ишдан олинди
Халқаро Жиноят Суди прокурори жинсий зўравонликда айбланмоқда.
Халқаро Жиноят Суди (ХЖС) Рим Статутига аъзо давлатлар Ассамблеяси Бюроси қарорига мувофиқ, прокурор Карим Хон унга нисбатан илгари сурилган жинсий зўравонлик айбловлари бўйича интизомий иш якуний қарори қабул қилинмагунча лавозимидан вақтинча четлаштирилди. Бу ҳақда суднинг расмий баёнотида маълум қилинди.
Қарор дарҳол кучга кирган бўлиб, мазкур ҳолат бўйича иш Иштирокчи Давлатлар Ассамблеясига кўриб чиқиш учун юборилди. Шунингдек, масалани муҳокама қилиш мақсадида яқин фурсатда махсус сессия чақирилиши режалаштирилган.
Суд баёнотида қайд этилишича, прокурорни лавозимидан четлатиш якуний ҳукм эмас, балки вақтинчалик чорадир. Якуний қарор интизомий иш бўйича тўлиқ текширув якунлангач қабул қилинади.
Мазкур қарор БМТ Ички назорат органи томонидан ўтказилган тергов ҳисоботлари, мавжуд далиллар ҳамда эксперт хулосалари асосида қабул қилинган.
Эслатиб ўтамиз, Карим Хон 2023 йилда Россия президенти Владимир Путин ва болалар ҳуқуқлари бўйича вакил Мария Лвова-Белова устидан ҳибсга олиш ордерини берган эди. Кейинчалик Россия Тергов қўмитаси унга нисбатан жиноят иши қўзғатган.
