Судялар учун мол-мулк ва даромадларни декларация қилиш тизими жорий этилади

 

Президентнинг 9 июндаги фармонига мувофиқ, Ўзбекистонда судялар, суд аппарати ходимлари ҳамда уларнинг оила аъзолари — турмуш ўртоғи ва вояга етмаган фарзандларининг даромадлари, мол-мулки ва манфаатлар тўқнашуви ҳолатларини декларация қилиш тизими босқичма-босқич йўлга қўйилади.

 

Ҳужжатга кўра, суд аппарати фаолиятида коррупсиянинг олдини олиш, манфаатлар тўқнашувини аниқлаш ва бартараф этиш мақсадида Комплаенс назорат хизматлари ташкил этилади. Ушбу тузилмалар суд аппаратидаги коррупсиявий хавф-хатарларни баҳолаш, ходимларнинг касб этикаси ва қонунчилик талабларига риоя этишини мониторинг қилиш ҳамда ишга қабул қилиш жараёнларининг шаффофлигини таъминлаш билан шуғулланади.

 

Шунингдек, Комплаенс назорат хизматлари суд аппарати ходимлари ва уларнинг оила аъзолари даромадлари ҳамда мол-мулки тўғрисидаги декларацияларни юритиш, манфаатлар тўқнашуви ҳолатларини назорат қилиш, маҳаллийчилик ва уруғ-аймоқчиликка қарши курашиш вазифаларини ҳам бажаради.

 

Фармонга мувофиқ, Судялар олий кенгаши 2026-йил 1-сентябрга қадар судялар томонидан даромадлар, мол-мулк ва манфаатлар тўқнашуви ҳақидаги маълумотларни топшириш, текшириш ҳамда таҳлил қилишга мўлжалланган автоматлаштирилган электрон тизимни ишга туширади.

 

Бундан ташқари, Олий суд 2027-йил 1-майга қадар суд аппарати ходимлари учун шундай электрон декларация тизимини жорий этади.

 

Ҳужжатда коррупсия ҳақида хабар берган ходимларни халқаро стандартлар асосида ҳимоя қилиш ва рағбатлантириш, шунингдек, фуқаролар учун хавфсиз алоқа каналларини яратиш ҳам назарда тутилган.

 

Шунингдек, Олий суд аппаратида Олий суд раисига бевосита бўйсунувчи Комплаенс назорат хизмати ташкил этилади. Ҳудудий судларда эса коррупсияга қарши назоратни амалга оширувчи махсус инспектор лавозимлари жорий қилинади.