Тошкентда ота 260 млн алиментни олдиндан тўлаб берди
Эркак фарзандларининг 18 ёшга тўлгунига қадар бўлган алимент мажбуриятларини муддатидан олдин бажариш истагини билдирган.
МИБнинг Янгиҳаёт туман бўлими иш юритувида бўлган алимент ундириш ҳақидаги ижро ҳужжати ижроси таъминланди.
Ижро ҳужжатларига мувофиқ, қарздор фуқаро 4 нафар фарзанди таъминоти учун алимент тўлаб келган бўлиб, у шу кунга қадар тўловларни ҳар ой белгиланган муддатларда амалга ошириб келган.
Кейинчалик қарздор собиқ турмуш ўртоғи билан ўзаро келишувга эришиб, фарзандларининг 18 ёшга тўлгунига қадар бўлган алимент мажбуриятларини муддатидан олдин бажариш истагини билдирган. Шунга кўра, давлат ижрочиси томонидан қонунчилик талаблари асосида ҳисоб-китоблар амалга оширилди.
Ҳисоб-китобларга кўра, 4 нафар фарзанднинг вояга етгунига қадар бўлган давр учун жами 265 миллион 907 минг сўм алимент маблағи белгиланган.
Натижада қарздор томонидан жорий йилнинг 8 июн куни мазкур маблағ тўлиқ тўланиб, ундирувчига ўтказилди. Шу тариқа, 4 нафар фарзанднинг келгусидаги таъминоти учун мўлжалланган алимент маблағи олдиндан қопланди ҳамда ижро ҳужжати амалда бажарилганлиги сабабли тамомланди.
