Афғонистондаги намойишда 2 аёл ҳалок бўлди

Афғонистонда исломий кийиниш қоидаларини бузганликда айбланган аёлларнинг ҳибсга олинишига қарши норозилик намойиши бўлиб ўтди. Унда 2 киши вафот этди. Аммо Толибон расмийлари буни тасдиқламади. Бу ҳақида BBC хабар берди.

 
Воқеа Афғонистоннинг ғарбий Ҳирот шаҳрида содир бўлган. Толибон полицияси ушбу ҳаракатларни “хавфсизликни таъминлаш ва жамоат тартибини сақлаш учун кўрилган чоралар” деб атаб, норозилик намойишида ўқ узилганини тан олган.

 
Нашрнинг таъкидлашича полиция намойишни тарқатиш учун қандай чоралар кўргани номаълум. Аммо гувоҳлар хавфсизлик кучлари таёқ, қамчи ва ўқотар қуроллардан фойдаланганини айтишган.

 
Ҳирот полиция қўмондонлиги вакили Сайид Масъуд Ҳусайний ҳолатга изоҳ берар экан намойишчиларни ҳижоб ўрашга қарши чиқиш баҳонасида кескинлик яратишга ҳаракат қилишда айблаган.

 
БМТнинг Афғонистондаги инсон ҳуқуқлари бўйича махсус вакили Ричард Беннет Х'даги саҳифасида Ҳиротдаги намойишчиларга керагидан ортиқ куч ишлатилганини айтиб Толибон ҳукуматини айбдорларга чора кўришга чақирган.

 
Толибон 2021 йил Афғонистон ҳокимиятига келганидан бир йил ўтиб, 2022 йил май ойидан бошлаб аёлларга ҳижоб ўрашни мажбурий қилган эди.

 
Эслатиб ўтамиз, 2022 йилда Эронда 22 ёшли Маҳса Амини рўмолни нотўғри ўрагани учун калтаклаб ўлдирилгани катта намойишга сабаб бўлган эди.