Агар хавфсиз бўлишни истасангиз, минтақамизни тарк этинг — Аббос Ароқчи
Эрон ТИВ АҚШ қўшинларини Яқин Шарқни тарк этишга чақирди.
Эрон ташқи ишлар вазири Аббос Ароқчи АҚШни Яқин Шарқдаги ҳарбий контингентини олиб чиқишга чақирди. Бу ҳақда у Х ижтимоий тармоғидаги саҳифасида маълум қилган.
Вазирнинг таъкидлашича, Эрон қуролли кучлари мамлакат хавфсизлигига қаратилган ҳар қандай таҳдид ёки ҳужумни жавобсиз қолдирмайди.
“Агар хавфсиз бўлишни истасангиз, минтақамизни тарк этинг”, — деб ёзган Ароқчи.
Шунингдек, у Эрон чегаралари яқинида фаолият юритаётган хорижий ҳарбий кучлар турли хавфларга дуч келаётганини қайд этган. Унинг фикрича, бундай хавфларнинг олдини олишнинг энг мақбул йўли минтақани тарк этишдир.
Ароқчи Теҳрон дипломатик мулоқотни афзал кўришини таъкидлаб, зарурат туғилганда Эрон ўз манфаатларини бошқа воситалар орқали ҳам ҳимоя қилишга тайёр эканини билдирган.
Мазкур баёнот АҚШ ва Эрон ўртасидаги кескинлик кучайган бир пайтда янграмоқда. Аввалроқ АҚШ президенти Доналд Трамп Ҳормуз бўғози яқинида AH-64 Apache вертолёти билан боғлиқ ҳодиса юз берганини маълум қилган ва Вашингтон бунга жавоб қайтарган эди.
