Энг арзон гўшт қаерда сотилади?
Иқтисодчи Миркомил Холбоев олиб борган тадқиқотга кўра, Жиззах, Наманган, ва Қашқадарё вилоятларида гўшт нархи бошқа вилоятларникига қараганда қиммат нархда сотилмоқда.
Энг қиммат номинал нарх Тошкент шаҳрида бошқа ҳудудларга нисбатан юқори шаклланган. Хусусан, 3 июн ҳолатига Тошкент шаҳрида мол гўштининг ўртача нархи 132,8 минг сўмни ташкил этган. Энг паст нарх эса Қорақалпоғистон Республикасида бўлиб, мол гўштининг ўртача нархи 107,5 минг сўмга тенг. Иқтисодчи Миркомил Холбоев Ўзбекистондаги гўшт нархи ҳақида Телеграм саҳифасида таҳлилини эълон қилди.
Иқтисодчининг ёзишича, Тошкент шаҳрида бошқа вилоятларга қараганда гўштнинг номинал нархи барча вилоятлардан қиммат бўлса-да, ойлик иш ҳақини таққослаганда пойтахтда гўшт нархи бошқа ҳудудларга нисбатан энг арзон ҳисобланади.
“Ўртача тошкентлик ойлик даромади билан 88 кг мол гўшти сотиб олиши мумкин. Таққослаш учун, халқ тилида энг кўп гўшт ейдиган ҳудудлардан бири сифатида айтиладиган Сурхондарёда бу кўрсаткич 37,8 кг ни ташкил этади. Яъни ўртача Сурхондарёлик ойлик маоши билан ўртача тошкентликдан 2,3 баробар камроқ гўшт сотиб ололади. Шунингдек, Харид қобилияти бўйича Навоий (70,7 кг), Тошкент вилояти (50 кг) каби ҳудудларда ҳам гўшт нархи нисбатан арзон шаклланган”, — дейилади таҳлилда.
Бундан ташқари, Қорақалпоғистонда ўртача кўрсаткичдан пастроқ иш ҳақи шаклланган бўлишига қарамасдан гўшт нархининг бошқа ҳудудларга нисбатан сезиларли фарқ қилиши сабабли гўшт харид қобилияти нисбатан юқори шаклланган. Сурхондарё сингари Жиззах, Қашқадарё, Наманган вилоятларида мол гўшти нархи республикада энг юқори шаклланган ҳудудлардан ҳисобланади.
Холбоевнинг ёзишича, гўшт нархини туманлар кесимида олиб қаралса, энг қиммат гўшт Фориш туманида эканлигини аниқланган. Мазкур туманда одамлар оладиган ойликка 26 кг гўшт сотиб олиши мумкин. Шунингдек туманда гўштнинг номинал нархи ҳам Республикадаги энг юқори ҳисобланади. Туманда 1 кг гўшт нархи 140,2 минг сўмга тенг.
Энг арзон гўшт нархи туманлар кесимида Тошкент шаҳридаги, Миробод, Учқудуқ, Юнусобод туманларига тўғри келмоқда. Юқорида келтирилган туманларда яшовчи фуқароларнинг ойлик маошига 100 кг дан кўпроқ гўш сотиб олиши мумкин. Шунингдек гўшт нархи энг арзон шаклланган 20 та туманнинг 8 таси Тошкент шаҳрида жойлашган.
Фориш туманида гўшт нархи қиммат бўлиши билан бирга ойлик маошлар ҳам паст даражада. Чунки туманда яшовчилар бир ой ишлаб топган пулига бор йўғи 26 кг гўш сотиб олиши мумкин. Статистика қўмитаси томонидан ойлик маошлар ҳақида эълон қилинган ҳисобга кўра, Жиззах вилоятида ўтача иш ҳақи 5 млн 142 минг 800 сўмни ташкил қилган. Аммо бу ўртача ойлик ҳисобланади, бу ойлик олмаётганлар ҳам бундан кўп олаётганлар ҳам бор.
