Интерпол қидирувидаги ўзбекистонлик эркак Молдовадан экстрадиция қилинди
Эркак фирибгарлик жиноятини содир этганликда айбланиб, халқаро қидирувга берилган.
Фирибгарлик жиноятини содир этганликда айбланиб, халқаро қидирувга берилган Ўзбекистон фуқароси Молдовадан Ўзбекистонга экстрадиция қилинди. Бу ҳақда ИИВ маълум қилди.
Ўзбекистон ва Молдова Интерпол Миллий марказий бюролари ўртасидаги ҳамкорлик ҳамда мувофиқлаштирилган тезкор-қидирув тадбирлари натижасида қидирувдаги шахснинг яшаш манзили аниқланиб, у Кишинёв шаҳрида қўлга олинган.
Маълум қилинишича, мазкур шахсга нисбатан халқаро қидирув Ўзбекистон Интерпол Миллий марказий бюроси томонидан Интерпол каналлари орқали эълон қилинган. Уни аниқлаш ва ушлаш жараёнида икки давлатнинг ваколатли тузилмалари ўртасида мунтазам ахборот алмашинуви йўлга қўйилган.
Экстрадиция билан боғлиқ барча ҳуқуқий ва процессуал жараёнлар якунлангач, қидирувдаги шахс жиноий жавобгарликка тортиш учун Ўзбекистоннинг ваколатли органларига топширилган.
