"Кўчага қолишга тайёр бўлсангиз, кредит олинг" — Эркинжон Турдимов
Сирдарё вилояти ҳокими фуқаролар қабулида кредит олишда ёрдам сўраб келган онахонга кредит олмасликни тавсия қилди.
Сирдарё вилояти ҳокими Эркинжон Турдимов фуқаролардан бирининг томорқасига сув чиқариш учун 120 миллион сўм кредит олиш ҳақидаги мурожаатига муносабат билдириб, кредит олиш масаласида эҳтиёткор бўлишга чақирди.
Ҳокимнинг таъкидлашича, деҳқончилик фаолияти юқори таваккал билан боғлиқ бўлиб, ҳосилнинг нобуд бўлиши, табиий офатлар, сув босиши, зараркунандалар ёки бошқа кутилмаган ҳолатлар кредитни ўз вақтида қайтаришни қийинлаштириши мумкин.
«Шунга тайёрман десангиз, банкка мурожаат қилинглар. Кўчада қолишга тайёр бўлсангиз. Бўлмаса, кредитга мурожаат қилманг», — деган вилоят ҳокими.
“Эртага кредитнинг фоизини ва асосий қисмини қайтара олмай қолсангиз, уйингизни сотиб юбориб кредитни қайтаришга тайёрмисиз? Ана шу саволни аввало ўзингизга беринг”, — дея таъкидлаган Эркинжон Турдимов.
Унинг сўзларига кўра, кредит бўйича қарздорлик ортиб кетиши мол-мулкни сотишга мажбур қилиши мумкин. Шу боис ҳоким фуқароларни имкониятларини пухта ҳисоблаб, ортиқча таваккал қилмасликка чақирган.
Шунингдек, ҳоким мурожаатчининг томорқасига сув чиқариш муаммосини кредит ҳисобидан эмас, балки ҳокимлик ва мутасадди ташкилотлар кўмагида ҳал этиш мумкинлигини маълум қилган. Сув чиқариш ва ерга техник ёрдам кўрсатиш учун тегишли хизматларга топшириқ берилиши айтилган.
“Томорқангизга сув чиқариб беришга, ишлатишга, ҳаммасига кўмак берилади. Кредит олиб ўзингизни қийин аҳволга солиб қўйманг”, — дея қўшимча қилган ҳоким.
