ТИВ Ўзбекистон терма жамоаси футболчилари текширилгани юзасидан АҚШдан расмий изоҳ сўради
Ташқи ишлар вазирлиги спорт тадбирларида хавфсизлик чоралари ўзаро ҳурмат ва дўстона муносабатларга путур етказмаслиги лозимлигини таъкидлади.
АҚШнинг Нью Ёрк шаҳрида Ўзбекистон ва Нидерландия терма жамоалари ўртасидаги ўртоқлик учрашуви олдидан Ўзбекистон миллий терма жамоаси футболчилари ҳамда мураббийлар штаби аъзолари қатъий хавфсизлик текширувидан ўтказилгани юзасидан Ўзбекистон Ташқи ишлар вазирлиги тегишли чораларни кўрган.
ТИВ матбуот котиби Омонулла Файзиевнинг Zamon.uz'га маълум қилишича, мазкур ҳолат юзасидан Ўзбекистоннинг Нью Ёркдаги Бош консулхонаси орқали АҚШнинг ваколатли идоралари билан алоқа ўрнатилиб, вазият бўйича расмий тушунтириш сўралган.
Қайд этилишича, ҳар бир давлат ўз ҳудудида хавфсизлик чораларини миллий қонунчилик ва ички тартиб-қоидалар асосида амалга ошириш ҳуқуқига эга. Шу билан бирга, бундай жараёнлар халқаро спорт мусобақаларининг асосий тамойиллари бўлган ўзаро ҳурмат, тенглик ва дўстона муносабатларга салбий таъсир кўрсатмаслиги муҳим экани таъкидланган.
Аввалроқ ижтимоий тармоқларда 8 июн куни бўлиб ўтган учрашув арафасида Ўзбекистон терма жамоаси футболчилари қўл металлодетекторлари ёрдамида текширилгани акс этган видеолар тарқалган эди. Кадрларда хавфсизлик ходимлари футболчилар ва мураббийлардан сумкалар ҳамда спорт анжомларини ерга қўйишни сўрагани, ҳудудда хизмат ити билан кинолог ва бошқа хавфсизлик ходимлари фаолият олиб боргани кўринган.
