Ўзбекистонда 10 дан ортиқ наркожиноятлар бўйича жазо чоралари оғирлаштирилади
Нарколаборатория ташкил этиш, наркотикларнинг ноқонуний муомаласига раҳнамолик қилиш, бангихона ташкил қилиш учун алоҳида жавобгарлик белгиланмоқда.
Президент Шавкат Мирзиёев аҳоли саломатлиги ва миллат генофондини гиёҳвандликдан ҳимоя қилиш, шунингдек, йўл ҳаракати иштирокчилари хавфсизлигини таъминлашга қаратилган қонунчиликни такомиллаштириш юзасидан тақдимот билан танишди.
Маълум қилинишича, тақдимотда гиёҳвандлик воситалари, психотроп моддалар, уларнинг аналоглари ҳамда кучли таъсир қилувчи моддаларнинг қонунга хилоф муомаласи учун жавобгарликни кучайтиришга қаратилган қонун мазмун-моҳияти ҳақида маълумот берилди. Мазкур қонун парламент томонидан қабул қилинган.
Қонун билан Жиноят кодексига “Аҳоли саломатлиги ва генофондига қарши жиноятлар” номли янги боб киритилмоқда. Бу орқали аҳоли, айниқса ёшлар саломатлигига таҳдид солаётган хавфли қилмишлар учун жавобгарлик чораларини кучайтириш кўзда тутилган.
Шунингдек, наркожиноятларнинг замонавий усул ва шакллари инобатга олиниб, ғайриқонуний нарколабораториялар ташкил этиш, наркотикларнинг ноқонуний муомаласига раҳнамолик қилиш ҳамда бангихоналар ташкил этиш каби қилмишлар учун алоҳида жавобгарлик белгиланмоқда. Бундан ташқари, 10 дан ортиқ хавфли қилмиш бўйича жазо чоралари оғирлаштирилади.
Давлат раҳбари ушбу қонун наркожиноятчиликка қарши курашни янги босқичга олиб чиқиши, аҳоли саломатлиги ва миллат генофондини ҳимоя қилишда муҳим ҳуқуқий асос бўлишини таъкидлаб, уни имзолади.
Тақдимот давомида идоралараро ишчи гуруҳ томонидан ишлаб чиқилган “Наркотиклар ва кучли таъсир қилувчи моддалар тўғрисида”ги қонун лойиҳаси юзасидан ҳам ахборот берилди.
Қайд этилишича, сўнгги йилларда нарковазият жиддий ўзгариб, анъанавий гиёҳвандлик воситаларининг ўрнини синтетик наркотиклар эгалламоқда. Уларни тарқатиш усуллари ҳам ўзгариб, асосан интернет орқали контактсиз шаклда амалга оширилмоқда.
Шунингдек, мамлакат ичкарисида яширин лабораторияларнинг пайдо бўлаётгани ушбу соҳада ҳуқуқий ва ташкилий механизмларни тубдан қайта кўриб чиқишни тақозо этмоқда.
Янги қонун лойиҳасида давлат сиёсатининг 7 та асосий йўналиши белгиланган. Улар орасида аҳоли, айниқса хотин-қизлар ва ёшлар орасида “гиёҳвандликка қарши иммунитет”ни шакллантириш, интернет орқали содир этилаётган наркожиноятларга барҳам бериш, гиёҳвандликнинг барвақт профилактикаси, диагностикаси, даволаш ҳамда тиббий-ижтимоий реабилитация тизимини такомиллаштириш каби чоралар мавжуд.
Шунингдек, лойиҳада наркотиклар айланмаси, гиёҳвандлик ва наркожиноятларга қарши курашишда бевосита иштирок этувчи 14 та давлат органининг вазифа ва ваколатлари аниқ белгиланиши назарда тутилмоқда. Қонуний муомаладаги моддалар устидан давлат назорати кучайтирилиб, уларни олиб киришдан тортиб реализация қилишгача бўлган жараёнлар узлуксиз электрон назоратга олинади.
Прекурсорлар, гиёҳвандлик воситалари ва психотроп моддалар муомаласини қатъий тартибга солишни такомиллаштириш бўйича таклифлар ҳам кўриб чиқилди. Бу борада электрон назорат тизимини жорий этиш ҳамда ноқонуний ҳолатларга қарши идоралараро ҳамкорликни кучайтириш зарурлиги қайд этилди.
