Ўзбекистонда иш ташлашни амалга ошириш тартиби белгиланди
Эндиликда жамоавий меҳнат низосини яраштириш йўли билан ҳал этишнинг имкони бўлмаса, меҳнат жамоаси иш ташлаш тўғрисида қарор қабул қилиши мумкин.
Ўзбекистонда жамоавий меҳнат низолари юзага келган ҳолларда иш ташлашни ташкил этиш тартиби қонун билан белгиланди. Бу ҳақда “Ҳуқуқий ахборот” Теlegram-канали хабар берди.
Президент томонидан имзоланган “Айрим қонун ҳужжатларига ўзгартириш ва қўшимчалар киритиш тўғрисида”ги қонунга (ЎРҚ–1150-сон, 2026 йил 11 июнь) мувофиқ, агар жамоавий меҳнат низосини яраштириш тартиб-таомиллари орқали ҳал этишнинг имкони бўлмаса, меҳнат жамоаси иш ташлаш тўғрисида қарор қабул қилиши мумкин.
Қонунга кўра, иш ташлашда қатнашиш ихтиёрий ҳисобланади. Ҳеч ким иш ташлашда қатнашишга ёки ундан бош тортишга мажбурланиши мумкин эмас.
Иш ташлашни эълон қилиш ҳақидаги қарор ташкилот ходимларининг умумий йиғилишида иштирок этаётган ходимларнинг 50 фоизидан кўпроғи томонидан маъқулланган тақдирда қабул қилинади. Бундай қарор иш ташлаш бошланишидан камида бир ой олдин қабул қилиниши лозим.
Шунингдек, касаба уюшмаси қўмитаси иш ташлаш эълон қилингани ҳақида иш берувчини қарор қабул қилинган пайтдан бошлаб бир иш кунидан кечиктирмай ёзма равишда хабардор қилиши керак.
Ўз навбатида, иш берувчи бўлажак иш ташлаш тўғрисидаги ёзма билдиришномани олганидан кейин бир иш куни ичида жамоавий меҳнат низоларини тартибга солиш бўйича ваколатли давлат органларини ёзма равишда огоҳлантиради.
Мазкур қонун расмий эълон қилинган кундан эътиборан уч ой ўтгач кучга киради.
