Фарғонада МИБ орқали келин сепларини қайтариб олди
Маълум бўлишича, бу масала қайнона ва келин ўртасида можароларга сабаб бўлиб келган.
Қўштепа туманида узоқ вақт давомида баҳсларга сабаб бўлиб келган келин сепи масаласига қонуний ечим топилди.
Фуқаролик ишлари бўйича суднинг ижро ҳужжати асосида Мажбурий ижро бюроси Қўштепа туман бўлими давлат ижрочилари томонидан амалий чоралар кўрилди. Ижро ҳаракатлари давомида низога сабаб бўлган сеп буюмлари аниқланиб, белгиланган тартибда қонуний эгасига топширилди.
Томонлар ўртасидаги келишмовчиликлар туфайли узоқ вақт ҳал этилмай келган масала давлат ижрочиларининг саъй-ҳаракати билан қонуний тартибда бартараф этилди. Натижада суд қарори тўлиқ ижро қилиниб, фуқаронинг қонуний ҳуқуқлари тикланди.
Сеп билан боғлиқ баҳслар кўпинча оилавий можароларнинг энг оғриқли нуқтасига айланади. Қўштепадаги мазкур ҳолатда ҳам масала суд қарори ва ижро ҳаракатлари орқали ўз ечимини топди.
