Фарғонада солиқдан қарздор фермерларнинг машиналари хатланмоқда
Эндиликда мазкур мулкларни реализация қилиш орқали давлат бюджети олдидаги қарздорликни қоплаш чоралари кўрилади.
Бешариқ туманида давлат бюджети олдидаги қарздорлик қимматга тушди. Мажбурий ижро бюроси томонидан олиб борилган рейд тадбирлари давомида қарздор фермер хўжаликларига тегишли автотранспорт воситалари хатланиб, жарима майдонига жойлаштирилди.
Маълум бўлишича, “Қ.Қ.” фермер хўжалигининг солиқ ва бошқа мажбурий тўловлардан қарзи 225 миллион 534 минг сўм, “Я.Р.” фермер хўжалигининг қарзи эса 280 миллион сўмга етган.
МИБ давлат ижрочилари томонидан ЙПХ ходимлари билан ҳамкорликда ўтказилган тадбир давомида қарздор хўжаликлар балансидаги транспорт воситалари аниқланиб, белгиланган тартибда хатланган ва жарима майдонига олиб кетилган.
Эндиликда мазкур мулкларни реализация қилиш орқали давлат бюджети олдидаги қарздорликни қоплаш чоралари кўрилмоқда.
