Fitch “Ўзбекгидроенерго” рейтинг прогнозини “Ижобий”га оширди
Компаниянинг узоқ муддатли халқаро кредит рейтинги “BB” даражасида тасдиқланди.
Халқаро рейтинг агентлиги Fitch Ratings “Ўзбекгидроенерго” АЖнинг узоқ муддатли халқаро кредит рейтингини “BB” даражасида тасдиқлаб, рейтинг прогнозини “Барқарор”дан “Ижобий”га ўзгартирди.
Қайд этилишича, мазкур қарор Ўзбекистон Республикасининг суверен кредит рейтинги прогнози ижобий томонга қайта кўриб чиқилгани билан боғлиқ. Агентлик мамлакатда амалга оширилаётган иқтисодий ислоҳотлар, макроиқтисодий барқарорликни таъминлаш, фискал интизомни мустаҳкамлаш ва инвестицион муҳитни яхшилаш борасидаги чора-тадбирларни ижобий баҳолаган.
Шу билан бирга, Fitch Ratings “Ўзбекгидроенерго” АЖ рейтингини баҳолашда компаниянинг мамлакат энергетика тизимидаги стратегик ўрни, давлат билан институционал алоқалари, молиявий интизоми, бошқарув сифати, операцион барқарорлиги ва ахборот шаффофлиги каби омилларни ҳам инобатга олган.
Агентликка кўра, жамиятнинг гидроенергетика соҳасидаги муҳим вазифалари, барқарор ишлаб чиқариш фаолияти, молиявий мажбуриятларга масъулиятли ёндашуви ҳамда эҳтиёткорона молиявий сиёсати унинг кредит барқарорлигини қўллаб-қувватлаётган асосий омиллар ҳисобланади.
Сўнгги йилларда “Ўзбекгидроенерго” томонидан гидроенергетика салоҳиятини кенгайтириш, ишлаб чиқариш қувватларини модернизация қилиш, янги инвестиция лойиҳаларини амалга ошириш ва бошқарув тизимини такомиллаштириш бўйича тизимли ишлар олиб борилмоқда.
Мутахассислар фикрича, рейтинг прогнозининг “Ижобий”га ўзгартирилиши компаниянинг халқаро инвесторлар ва молиявий институтлар олдидаги ишончлилигини янада мустаҳкамлаб, янги инвестицияларни жалб қилиш ҳамда халқаро ҳамкорликни кенгайтириш учун қўшимча имкониятлар яратади.
