Маст ҳолда автомобил бошқарганларга 15 суткагача қамоқ жазоси жорий этилиши мумкин
Беш турдаги қўпол қоидабузарлик учун маъмурий жазо сифатида транспорт воситасини вақтинча олиб қўйиш чораси таклиф этилмоқда.
Ўзбекистонда йўл ҳаракати қоидаларини қўпол равишда бузган ҳайдовчиларга нисбатан жавобгарлик чораларини кучайтириш бўйича қатор таклифлар ишлаб чиқилди.
Йўл ҳаракати хавфсизлиги хизмати бошлиғи Шерзод Иброҳимовнинг маълум қилишича, беш турдаги қўпол қоидабузарлик учун маъмурий жазо сифатида транспорт воситасини вақтинча олиб қўйиш чорасини жорий этиш таклиф этилмоқда.
Шунингдек, вояга етмаган шахсларга транспорт бошқаришга рухсат бериш, ноқонуний пойгалар ташкил этиш ёки уларда иштирок этиш, юк автомобилларини тунги вақтда йўл четида қолдириш каби ҳолатлар учун алоҳида маъмурий жавобгарлик белгилаш назарда тутилган.
Таклифларга кўра, транспорт бошқариш ҳуқуқига эга бўлмаган ёки бу ҳуқуқдан маҳрум этилган шахс томонидан содир этилган йўл безорилиги учун автомобилни мусодара қилиш ёки вақтинча олиб қўйиш чораси қўлланиши мумкин.
Бундан ташқари, транспорт воситасини маст ҳолда бошқарган шахсларга нисбатан 15 суткагача маъмурий қамоқ жазоси тайинлаш ҳам таклиф этилган.
Яна бир муҳим янгилик сифатида, қўпол қоидабузарлик содир этган ҳайдовчилар учун жарималарни чегирма асосида тўлаш имкониятини бир йил муддатга чеклаш таклифи илгари сурилган.
Шунингдек, вояга етмаган шахсга транспорт бошқаришга рухсат бериш, шунингдек, бундай ҳолатлар натижасида тан жароҳати, одам ўлими ёки бошқа оғир оқибатлар келиб чиққан тақдирда тўғридан-тўғри жиноий жавобгарлик жорий этиш масаласи ҳам кўриб чиқилмоқда.
