Сирдарёда ҳокимлик ходими 50 минг доллар пора билан ушланди
Мансабдор фуқаронинг ишончига кириб, давлат захирасидаги ер майдонини ажратиб беришни ваъда қилган.
Давлат хавфсизлик хизмати ходимлари томонидан вилоят прокуратураси билан ҳамкорликда ўтказилган тезкор тадбир давомида Гулистон шаҳар ҳокимлигининг масъул ходими қўлга олинди. Бу ҳақда ДХХ Zamon.uz'га хабар берди.
Аниқланишича, у тадбиркорлик фаолиятини йўлга қўймоқчи бўлган фуқаронинг ишончига кириб, шаҳарнинг Ўзбекистон шоҳ кўчасида жойлашган ва давлат захирасида бўлган 2 сотих ер майдонини озиқ-овқат дўкони ташкил этиш учун мансабдор танишлари орқали олиб беришни ваъда қилган. Бунинг эвазига эса 50 минг АҚШ доллари талаб қилган.
Маълум қилинишича, мансабдор шахс талаб қилинган маблағнинг бир қисми сифатида фуқаронинг “Lasetti” русумли автомобилини 12 минг АҚШ долларига баҳолаб, бошқариш ҳуқуқини берувчи ишончнома асосида олиб қолган.
Тезкор тадбир давомида у келишилган пул маблағининг навбатдаги қисми ҳисобланган 8 минг АҚШ долларини олаётган вақтида ашёвий далиллар билан ушланган.
Ҳозирда мазкур ҳолат юзасидан мансабдор шахсга нисбатан жиноят иши қўзғатилиб, унга нисбатан “қамоқ” эҳтиёт чораси қўлланган. Тергов ҳаракатлари давом эттирилмоқда.
