Тошкент–Андижон ва Тошкент–Термиз йўналишларида тезюрар поездлар қатнови йўлга қўйилади
Қатновларни ташкил этиш мақсадида Кореядан 8 та замонавий электропоезд олиб келинади.
Ўзбекистонда Тошкент–Андижон ҳамда Тошкент–Термиз йўналишларида юқори тезликдаги поездлар ҳаракатини йўлга қўйиш режалаштирилмоқда.
Транспорт вазирлиги маълумотига кўра, Кореяда “Ўзбекистон темир йўллари” АЖ бош муҳандиси Шарофиддин Қодиров, Транспорт вазирлиги вакили Анвар Душаев ҳамда Hyundai Rotem президенти Ли Ёнг Бе ўртасида учрашув бўлиб ўтган.
Мулоқот давомида томонлар темирйўл транспорти соҳасидаги ҳамкорликнинг бугунги ҳолати ва истиқболли йўналишларини муҳокама қилган. Хусусан, “Ўзбекистон темир йўллари” АЖ учун ишлаб чиқарилаётган “Жалолиддин Мангуберди” номли юқори тезликда ҳаракатланувчи электропоездни белгиланган муддатларда етказиб бериш масалалари кўриб чиқилган.
Шунингдек, Тошкент–Андижон ва Тошкент–Термиз йўналишларида юқори тезликдаги қатновларни ташкил этиш мақсадида 8 та замонавий электропоездни етказиб бериш лойиҳаси юзасидан техник шартларни якуний келишиш билан боғлиқ масалалар батафсил муҳокама қилинган.
Учрашув якунида ўзаро манфаатли ҳамкорликни кенгайтириш, қўшма лойиҳаларни самарали амалга ошириш ҳамда темирйўл транспорти соҳасидаги шерикликни янги босқичга олиб чиқиш бўйича ҳамкорликни давом эттиришга келишиб олинган.
