Россияда авиация ёнилғиси тақчиллиги юзага келди

Россияда бензин тақчиллиги ортидан авиация ёқилғиси бозорида ҳам муаммолар кузатилмоқда. Бир қатор йирик аэропортлар самолётларга авиакеросин қуйиш бўйича чекловлар жорий этди. Бу ҳақда The Moscow Times ёзмоқда.

 

“Авиасионная антресол” Телеграм-канали маълумотига кўра, Махачқала, Минералние Води, Краснодар, Астрахан ва Нижний Новгород аэропортлари учувчилар учун эълон қилган NOTAN хабарномаларида ёнилғи лимити белгиланганини маълум қилган. Эндиликда самолётлар фақат парвозни амалга ошириш учун зарур бўлган ҳажмдаги авиакеросин билан таъминланмоқда.

 

Хусусан, Махачқала аэропортида Дубай йўналиши учун 8 тонна, Минск учун 3,5 тонна, Тошкент рейси учун эса 4 тонна ёнилғи лимити ўрнатилган. Чартер рейсларни ёнилғи билан таъминлаш эса алоҳида келишув асосида амалга оширилмоқда.

 

Мутахассислар муаммони май ойида Россиядаги нефтни қайта ишлаш заводларига уюштирилган кенг кўламли ҳужумлар билан боғламоқда. Маълумотларга кўра, бир ой давомида 16 та завод зарбага учраган, натижада мамлакатнинг марказий ҳудудларида нефтни қайта ишлаш ҳажми кескин қисқарган.

 

“Коммерсант” нашри манбаларининг билдиришича, май ойи охирида бир қатор авиакомпаниялар Санкт-Петербург, Екатеринбург, Уфа ва бошқа аэропортларда амалдаги шартномалар бўйича самолётларни ёқилғи билан таъминлаш имкони йўқлиги ҳақида огоҳлантирилган.

 

Санкт-Петербург товар-хомашё биржаси маълумотларига кўра, 4 майдан буён авиакеросин савдоси деярли тўхтаб қолган. Шу билан бирга, улгуржи бозорда ёқилғи нархи бир тонна учун рекорд даражадаги 113 минг рублгача кўтарилиб, март ойининг бошига нисбатан 52 фоизга қимматлашган.

 

Вазият фонида Россия ҳукумати 1 июндан 30 ноябргача авиакеросин экспортини тақиқлади. Расмийлар бу чорани ички бозордаги барқарорликни сақлаш зарурати билан изоҳлади.

 

Таҳлилчиларнинг фикрича, экспортга қўйилган тақиқ авиация ёқилғисининг ички бозордан чиқиб кетишининг олдини олиб, эҳтимолий тақчилликни юмшатишга хизмат қилади. Бироқ мамлакатдаги авиакеросин ишлаб чиқариш ҳажмини аниқ баҳолаш қийин, чунки Россия 2024 йилдан бошлаб нефть маҳсулотлари ишлаб чиқариш бўйича статистик маълумотларни махфийлаштирган. 

 

Аввалги очиқ маълумотларга кўра, Россияда йилига қарийб 11 миллион тонна авиакеросин ишлаб чиқарилган.