Саида Мирзиёева Миллий театрда “Адолат фасли” спектакли намойишида иштирок этди
Президент Администрацияси раҳбари спектаклда бош ролни ижро этган Ёдгор Саъдиевни 80 йиллик юбилейи билан табриклади.
Ўзбек миллий академик драма театрида саҳналаштирилган “Адолат фасли” спектакли намойиши бўлиб ўтди. Спектаклни томоша қилган Президент Администрацияси раҳбари Саида Мирзиёева ушбу саҳна асари Амир Темур ҳаётининг муҳим бир кунини ёритувчи кучли тарихий ва маънавий асар эканини таъкидлади.
Асарда Соҳибқирон сиймоси нафақат буюк давлат арбоби ва моҳир саркарда, балки юксак матонат, мустаҳкам ирода ва адолат тимсоли сифатида гавдалантирилгани қайд этилди.
Спектаклда бош ролни Ўзбекистон халқ артисти Ёдгор Саъдиев ижро этди. Саида Мирзиёева санъаткорни яқинда “Буюк хизматлари учун” ордени билан тақдирлангани ҳамда 80 йиллик юбилейи билан самимий табриклаб, унинг миллий театр санъати ривожига қўшган улкан ҳиссасини алоҳида эътироф этди.
Шунингдек, саҳна асарини яратган ижодий жамоанинг меҳнати юқори баҳоланиб, Миллий театр ва унга умрини бағишлаган фидойи санъаткорларнинг салоҳияти ушбу спектаклда яна бир бор намоён бўлгани таъкидланди.
