Римда миграция масаласи бўйича қарама-қарши намойишлар ўтказилди
Парламент муҳокамасига киритилган “реэмиграция” ташаббуси фонида ўтказилган акциялар давомида хавфсизликни таъминлаш учун минглаб полициячилар сафарбар этилди.
Италия пойтахти Римда миграция сиёсати юзасидан қарама-қарши позициядаги минглаб фуқаролар кўчаларга чиқди. Бу ҳақда DW хабар берди.
Намойишларга парламент муҳокамасига киритилган ва 50 минг имзо тўплаган “реэмиграция” тўғрисидаги фуқаролик ташаббуси сабаб бўлди.
“Ремигратион and Reconquest” ташаббуси ноқонуний мигрантларни депортация қилиш ҳамда мамлакатга кириш қоидаларини янада қатъийлаштиришни назарда тутади. Ушбу ташаббусни қўллаб-қувватлаган намойишчилар миграция сиёсатини кескинлаштириш ва чет элликларни мамлакатдан чиқаришни талаб қилди. Айрим иштирокчилар Муссолини даврига ишора қилувчи шиорларни ҳам илгари сурган.
Шу билан бирга, Римнинг бошқа ҳудудида чап қанот ҳаракатлари ва касаба уюшмалари томонидан мигрантларни қўллаб-қувватлаш акцияси ташкил этилди. Намойишчилар ксенофобия ва камситишларга қарши эканини билдириб, мигрантлар ҳуқуқларини ҳимоя қилишга чақирди.
Тартибни сақлаш учун минглаб полициячилар сафарбар этилди. Расмийларга кўра, акциялар жиддий тўқнашувлар ва зўравонликларсиз якунланган.
Миграция масаласи Италия бош вазири Жоржа Мелони ҳукумати фаолиятидаги энг долзарб сиёсий мавзулардан бири бўлиб қолмоқда.
