Эфиопияда автобус жарликка қулаши оқибатида камида 28 киши ҳалок бўлди
Жароҳатланганларнинг айримлари оғир аҳволда экани билдирилмоқда.
Эфиопиянинг Амҳара минтақасида йўловчи автобуси жарликка қулаб тушиши оқибатида камида 28 киши ҳалок бўлди, яна бир неча киши турли даражадаги тан жароҳатлари олди. Бу ҳақда Reuters хабар берди.
Маълумотларга кўра, ҳодиса 15 июн куни содир бўлган. Автобус Десси шаҳридан пойтахт Аддис-Абеба томон ҳаракатланаётган вақтда тахминан 100 метр чуқурликдаги жарликка қулаб тушган.
Воқеа жойига қутқарувчилар ва тиббиёт бригадалари зудлик билан етиб бориб, жабрланганларга ёрдам кўрсатган. Жароҳатланганларнинг айримлари оғир аҳволда экани билдирилмоқда.
Мутасаддилар ҳалокат сабабларини аниқлаш бўйича тергов ҳаракатларини бошлаган.
Маълумотларга кўра, Эфиопияда йўл-транспорт ҳодисалари тез-тез учраб туради. Бунга айрим ҳудудларда йўл инфратузилмасининг талаб даражасида эмаслиги, транспорт воситаларининг техник ҳолати ҳамда йўл ҳаракати қоидаларига риоя қилинмаслиги сабаб бўлаётгани қайд этилади.
